ಮದುವೆಯಾದ ಬಳಿಕ ಹೆಂಡತಿ ಮನೆಗೆ ಹೋಗುವ ಗಂಡ! ಇಡೀ ಕುಟುಂಬವನ್ನೇ ಕರೆದೊಯ್ಯುವ ಪ್ರೇಮ್; ಗಮನ ಸೆಳೆದ ‘ಯೇ ಪ್ರೇಮ್ ಮೋಲ್ ಲಿಯಾ’ ಟ್ರೈಲರ್!

ಮದುವೆಯಾದ ಬಳಿಕ ಹೆಂಡತಿ ಮನೆಗೆ ಹೋಗುವ ಗಂಡ! ಇಡೀ ಕುಟುಂಬವನ್ನೇ ಕರೆದೊಯ್ಯುವ ಪ್ರೇಮ್; ಗಮನ ಸೆಳೆದ ‘ಯೇ ಪ್ರೇಮ್ ಮೋಲ್ ಲಿಯಾ’ ಟ್ರೈಲರ್!

ಬಾಲಿವುಡ್‌ನಲ್ಲಿ ಕೌಟುಂಬಿಕ ಸಿನಿಮಾಗಳ ಮೂಲಕವೇ ಗುರುತಿಸಿಕೊಂಡಿರುವ ಖ್ಯಾತ ನಿರ್ದೇಶಕ ಸೂರಜ್ ಬರ್ಜಾತ್ಯ ಇದೀಗ ವಿಭಿನ್ನ ಪ್ರೇಮಕಥೆಯೊಂದಿಗೆ ಪ್ರೇಕ್ಷಕರ ಮುಂದೆ ಬರಲು ಸಿದ್ಧರಾಗಿದ್ದಾರೆ. ಆಯುಷ್ಮಾನ್ ಖುರಾನಾ ಹಾಗೂ ಶರ್ವರಿ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ‘ಯೇ ಪ್ರೇಮ್ ಮೋಲ್ ಲಿಯಾ’ (Yeh Prem Mol Liya) ಸಿನಿಮಾದ ಟ್ರೈಲರ್ ಬುಧವಾರ ಬಿಡುಗಡೆಯಾಗಿದೆ.

ಮದುವೆಯಾದ ಬಳಿಕ ಹೆಣ್ಣುಮಕ್ಕಳು ಗಂಡನ ಮನೆಗೆ ಹೋಗುವುದು ಸಾಮಾನ್ಯ ಸಂಪ್ರದಾಯ. ಆದರೆ, ಈ ಸಿನಿಮಾದಲ್ಲಿ ಅದಕ್ಕೆ ತದ್ವಿರುದ್ಧವಾದ ಕಥೆಯನ್ನು ನಿರ್ದೇಶಕರು ತೆರೆದಿಟ್ಟಿದ್ದಾರೆ.

ಹೆಂಡತಿ ಮನೆಗೆ ಹೋಗಲು ನಿರ್ಧರಿಸಿದ ಪ್ರೇಮ್!

ಸಿನಿಮಾದಲ್ಲಿ ಆಯುಷ್ಮಾನ್ ಖುರಾನಾ ಪ್ರೇಮ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರೆ, ಶರ್ವರಿ ಪೂರ್ವಾ ಪಾತ್ರದಲ್ಲಿ ನಟಿಸಿದ್ದಾರೆ. ಇಬ್ಬರೂ ಪರಸ್ಪರ ಪ್ರೀತಿಸಿ ಮದುವೆಯಾಗಲು ನಿರ್ಧರಿಸುತ್ತಾರೆ. ಆದರೆ, ಮದುವೆಯ ನಂತರ ಎಲ್ಲಿ ವಾಸಿಸಬೇಕು ಎಂಬ ಪ್ರಶ್ನೆ ಎದುರಾಗುತ್ತದೆ.

ಪೂರ್ವಾ ತನ್ನ ಕುಟುಂಬದ ಐವರು ಮಹಿಳೆಯರೊಂದಿಗೆ ವಾಸಿಸುತ್ತಿರುತ್ತಾಳೆ. ಕುಟುಂಬದ ಆರ್ಥಿಕ ಹೊಣೆಗಾರಿಕೆಯೂ ಆಕೆಯ ಮೇಲಿದೆ. ಹೀಗಾಗಿ ಮದುವೆಯಾದ ಬಳಿಕ ಕುಟುಂಬವನ್ನು ಬಿಟ್ಟು ಗಂಡನ ಮನೆಗೆ ಹೋಗಲು ಆಕೆಗೆ ಸಾಧ್ಯವಾಗುವುದಿಲ್ಲ.

ಇಡೀ ಕುಟುಂಬವನ್ನೇ ಹೆಂಡತಿ ಮನೆಗೆ ಕರೆತರುವ ನಾಯಕ!

ತಾನು ಪ್ರೀತಿಸಿದ ಹುಡುಗಿಯ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಪ್ರೇಮ್ ವಿಭಿನ್ನ ಉಪಾಯವೊಂದನ್ನು ಮಾಡುತ್ತಾನೆ. ಮದುವೆಯಾದ ಬಳಿಕ ತಾನೇ ಹೆಂಡತಿಯ ಮನೆಗೆ ಹೋಗಲು ನಿರ್ಧರಿಸುತ್ತಾನೆ. ಆದರೆ, ಆತ ಒಬ್ಬನೇ ಅಲ್ಲ, ತನ್ನ ಇಡೀ ಕುಟುಂಬವನ್ನೂ ಪೂರ್ವಾಳ ಮನೆಗೆ ಕರೆದುಕೊಂಡು ಹೋಗಲು ಮುಂದಾಗುತ್ತಾನೆ.

ಆರಂಭದಲ್ಲಿ ಈ ನಿರ್ಧಾರಕ್ಕೆ ಕುಟುಂಬದ ಸದಸ್ಯರಿಂದ ವಿರೋಧ ವ್ಯಕ್ತವಾಗುತ್ತದೆ. ಬಳಿಕ ಎರಡೂ ಕುಟುಂಬಗಳು ಒಟ್ಟಿಗೆ ವಾಸಿಸಲು ಒಪ್ಪಿಕೊಳ್ಳುತ್ತವೆ. ಮನೆಯ ಆರ್ಥಿಕ ಜವಾಬ್ದಾರಿಯನ್ನು ಇಬ್ಬರೂ ಹಂಚಿಕೊಳ್ಳುವುದಾಗಿ ಪ್ರೇಮ್ ಮತ್ತು ಪೂರ್ವಾ ನಿರ್ಧರಿಸುತ್ತಾರೆ.

ಪ್ರೀತಿಯ ನಡುವೆ ಶುರುವಾಗುತ್ತೆ ಕೌಟುಂಬಿಕ ಕಲಹ!

ಎರಡು ಕುಟುಂಬಗಳು ಒಂದೇ ಮನೆಯಲ್ಲಿ ವಾಸಿಸಲು ಆರಂಭಿಸಿದ ಬಳಿಕ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳು ಎದುರಾಗುತ್ತವೆ. ದಿನ ಕಳೆದಂತೆ ಜಗಳಗಳು ಹೆಚ್ಚಾಗುತ್ತವೆ. ಇದರಿಂದ ಪ್ರೇಮ್ ಮತ್ತು ಪೂರ್ವಾಳ ಸಂಬಂಧವೂ ಸಂಕಷ್ಟಕ್ಕೆ ಸಿಲುಕುತ್ತದೆ ಎಂಬ ಸುಳಿವನ್ನು ಟ್ರೈಲರ್ ನೀಡಿದೆ.

ಈ ನಡುವೆ ಪ್ರೇಮ್‌ನ ತಂದೆ ಪೂರ್ವಾಳ ಕುಟುಂಬದ ವಿರುದ್ಧ ನ್ಯಾಯಾಲಯದಲ್ಲಿ ದಾವೆ ಹೂಡಿರುವ ವಿಚಾರವೂ ಟ್ರೈಲರ್‌ನ ಆರಂಭದಲ್ಲೇ ಬಹಿರಂಗವಾಗುತ್ತದೆ.

ಪುರುಷ ಪ್ರಧಾನ ವ್ಯವಸ್ಥೆಗೆ ಸೂರಜ್ ಬರ್ಜಾತ್ಯ ಸವಾಲು!

‘ಹಮ್ ಆಪ್ಕೆ ಹೈ ಕೌನ್’, ‘ಹಮ್ ಸಾಥ್ ಸಾಥ್ ಹೈ’, ‘ವಿವಾಹ್’ ಹಾಗೂ ‘ಪ್ರೇಮ್ ರತನ್ ಧನ್ ಪಾಯೋ’ ಸಿನಿಮಾಗಳ ಮೂಲಕ ಭಾರತೀಯ ಕುಟುಂಬ ವ್ಯವಸ್ಥೆ, ಸಂಪ್ರದಾಯ ಹಾಗೂ ಸಂಬಂಧಗಳ ಮಹತ್ವವನ್ನು ತೆರೆದಿಟ್ಟಿದ್ದ ಸೂರಜ್ ಬರ್ಜಾತ್ಯ, ಈ ಬಾರಿ ಬದಲಾಗುತ್ತಿರುವ ಸಾಮಾಜಿಕ ವ್ಯವಸ್ಥೆಯತ್ತ ಗಮನ ಹರಿಸಿದ್ದಾರೆ.

ಮದುವೆಯಾದ ಬಳಿಕ ಹೆಣ್ಣುಮಕ್ಕಳೇ ತಮ್ಮ ಕುಟುಂಬವನ್ನು ಬಿಟ್ಟು ಹೋಗಬೇಕಾ? ಗಂಡುಮಕ್ಕಳು ಹೆಂಡತಿಯ ಕುಟುಂಬದೊಂದಿಗೆ ವಾಸಿಸಿದರೆ ತಪ್ಪೇನು? ಮನೆಯ ಆರ್ಥಿಕ ಜವಾಬ್ದಾರಿಯನ್ನು ಪತಿ-ಪತ್ನಿ ಸಮಾನವಾಗಿ ಹಂಚಿಕೊಳ್ಳಲು ಸಾಧ್ಯವಿಲ್ಲವೇ? ಎಂಬ ಪ್ರಶ್ನೆಗಳನ್ನು ಸಿನಿಮಾ ಮುಂದಿಡುವಂತಿದೆ.

ಪ್ರೀತಿ, ಕುಟುಂಬ, ಭಾವನೆಗಳು ಹಾಗೂ ಸಂಪ್ರದಾಯಗಳ ನಡುವಿನ ಸಂಘರ್ಷವನ್ನು ಒಳಗೊಂಡಿರುವ ಈ ಸಿನಿಮಾದಲ್ಲಿ ಪ್ರೇಮ್ ಮತ್ತು ಪೂರ್ವಾ ತಮ್ಮ ಸಂಬಂಧವನ್ನು ಉಳಿಸಿಕೊಳ್ಳುತ್ತಾರಾ ಎಂಬ ಕುತೂಹಲವನ್ನು ಟ್ರೈಲರ್ ಹುಟ್ಟುಹಾಕಿದೆ.

Leave a Reply

Your email address will not be published. Required fields are marked *