ನಿಮ್ಮ ಕಣ್ಣಿಗೆ ಕಾಣುವುದೂ ಸುಳ್ಳಾಗಿರಬಹುದು! AI ಡೀಪ್ಫೇಕ್ ಬಳಸಿ ನಡೆಯುತ್ತಿದೆ ಕೋಟ್ಯಂತರ ರೂಪಾಯಿ ಹೂಡಿಕೆ ವಂಚನೆ!
ಪ್ರಧಾನಿ, ರಾಜಕಾರಣಿಗಳ ವಿಡಿಯೋಗಳನ್ನೇ ನಕಲು ಮಾಡ್ತಿದ್ದಾರೆ ಸೈಬರ್ ಖದೀಮರು! ಒಂದು ಕ್ಲಿಕ್ ಮಾಡಿದ್ರೆ ಬ್ಯಾಂಕ್ ಖಾತೆಯೇ ಖಾಲಿ?
ಕೇಂದ್ರ ಹಣಕಾಸು ಸಚಿವರ AI ವಿಡಿಯೋ ಬಳಸಿ ವಂಚನೆ!
ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಿಸುವ ಪ್ರತಿಯೊಂದು ವಿಡಿಯೋವನ್ನೂ ನಂಬುವ ಮುನ್ನ ಎಚ್ಚರ! ಯಾಕೆಂದರೆ ಈಗ ಸೈಬರ್ ವಂಚಕರು ಸಾಮಾನ್ಯ ಜನರಷ್ಟೇ ಅಲ್ಲ, ಹೂಡಿಕೆ ಮಾಡಲು ಬಯಸುವವರನ್ನೂ ಗುರಿಯಾಗಿಸಿಕೊಂಡಿದ್ದಾರೆ. ಖ್ಯಾತ ವ್ಯಕ್ತಿಗಳ ಮುಖ ಮತ್ತು ಧ್ವನಿಯನ್ನೇ AI ತಂತ್ರಜ್ಞಾನದ ಮೂಲಕ ನಕಲು ಮಾಡಿ ಹಣ ಲೂಟಿ ಮಾಡುತ್ತಿದ್ದಾರೆ. ಇದಕ್ಕೆ ತಾಜಾ ಉದಾಹರಣೆ ಕೇರಳದಲ್ಲಿ ನಡೆದಿರುವ ಸೈಬರ್ ವಂಚನೆ ಪ್ರಕರಣ.
ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರೇ ಹೂಡಿಕೆ ಮಾಡಿ ಹೆಚ್ಚಿನ ಲಾಭ ಗಳಿಸುವಂತೆ ಹೇಳುತ್ತಿರುವ ವಿಡಿಯೋವೊಂದು ಫೇಸ್ಬುಕ್ನಲ್ಲಿ ಕಾಣಿಸಿಕೊಂಡಿದೆ. ಈ ವಿಡಿಯೋವನ್ನು ನಿಜವೆಂದು ನಂಬಿದ ಕೇರಳದ ಕೋಝಿಕ್ಕೋಡ್ ಜಿಲ್ಲೆಯ 63 ವರ್ಷದ ಉದ್ಯಮಿಯೊಬ್ಬರು ಬರೋಬ್ಬರಿ ₹1.41 ಕೋಟಿ ಕಳೆದುಕೊಂಡಿದ್ದಾರೆ.
ಪೊಲೀಸ್ ಮಾಹಿತಿಯ ಪ್ರಕಾರ, ನೊಚಾಡ್ ಪ್ರದೇಶದ ಅಬ್ದುರಹಿಮಾನ್ ಪಿ ಎಂಬುವವರು ಫೇಸ್ಬುಕ್ನಲ್ಲಿ ನಿರ್ಮಲಾ ಸೀತಾರಾಮನ್ ಅವರ ನಕಲಿ ವಿಡಿಯೋವನ್ನು ನೋಡಿದ್ದರು. ಆನ್ಲೈನ್ ಟ್ರೇಡಿಂಗ್ ಪ್ಲಾಟ್ಫಾರ್ಮ್ನಲ್ಲಿ ಹೂಡಿಕೆ ಮಾಡಿದರೆ ಆಕರ್ಷಕ ಲಾಭ ಸಿಗಲಿದೆ ಎಂಬ ಸಂದೇಶವನ್ನು ವಿಡಿಯೋದಲ್ಲಿ ಬಿಂಬಿಸಲಾಗಿತ್ತು.
ಇದನ್ನು ನಿಜವೆಂದು ನಂಬಿದ ಉದ್ಯಮಿ, ವಿಡಿಯೋದೊಂದಿಗೆ ನೀಡಲಾಗಿದ್ದ ಲಿಂಕ್ ಮೇಲೆ ಕ್ಲಿಕ್ ಮಾಡಿದ್ದಾರೆ. ಬಳಿಕ ಆನ್ಲೈನ್ ಹೂಡಿಕೆ ಪ್ಲಾಟ್ಫಾರ್ಮ್ ನಡೆಸುತ್ತಿದ್ದವರ ಸೂಚನೆಯಂತೆ ಹಣ ವರ್ಗಾವಣೆ ಮಾಡಲು ಆರಂಭಿಸಿದ್ದಾರೆ.
ಹೀಗೆ 2025ರ ಜೂನ್ 6ರಿಂದ 2026ರ ನವೆಂಬರ್ 4ರವರೆಗೆ ತಮ್ಮ ಎರಡು ಬ್ಯಾಂಕ್ ಖಾತೆಗಳಿಂದ ಒಟ್ಟು 30 ಪ್ರತ್ಯೇಕ ವಹಿವಾಟುಗಳ ಮೂಲಕ ವಿವಿಧ ಬ್ಯಾಂಕ್ ಖಾತೆಗಳಿಗೆ ₹1.41 ಕೋಟಿ ವರ್ಗಾಯಿಸಿದ್ದಾರೆ. ಆದರೆ, ವಂಚಕರು ಭರವಸೆ ನೀಡಿದ್ದ ಲಾಭವೂ ಸಿಗಲಿಲ್ಲ, ಹೂಡಿಕೆ ಮಾಡಿದ್ದ ಅಸಲು ಹಣವೂ ವಾಪಸ್ ಬರಲಿಲ್ಲ.
ಹಣ ಮರಳಿ ಸಿಗಬಹುದು ಎಂಬ ನಿರೀಕ್ಷೆಯಲ್ಲಿ ಉದ್ಯಮಿ ತಕ್ಷಣ ದೂರು ನೀಡಿರಲಿಲ್ಲ ಎನ್ನಲಾಗಿದೆ. ಕೊನೆಗೆ ವಂಚನೆಗೆ ಒಳಗಾಗಿರುವುದು ಅರಿವಾದ ಬಳಿಕ ಕೋಝಿಕ್ಕೋಡ್ ರೂರಲ್ ಸೈಬರ್ ಕ್ರೈಂ ಪೊಲೀಸರನ್ನು ಸಂಪರ್ಕಿಸಿದ್ದಾರೆ.
ಈ ಸಂಬಂಧ ನವೆಂಬರ್ 14ರಂದು ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 318(4) ಮತ್ತು ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್ 66D ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಆರೋಪಿಗಳನ್ನು ಇನ್ನೂ ಗುರುತಿಸಲಾಗಿಲ್ಲ. ಹಣ ವರ್ಗಾವಣೆಯಾದ ಬ್ಯಾಂಕ್ ಖಾತೆಗಳು ಮತ್ತು ಉದ್ಯಮಿಗೆ ಬಂದಿದ್ದ ದೂರವಾಣಿ ಕರೆಗಳ ಆಧಾರದ ಮೇಲೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಸಾರ್ವಜನಿಕರಿಗೆ ಎಚ್ಚರಿಕೆ!
ಇಲ್ಲಿ ಗಮನಿಸಬೇಕಾದ ಪ್ರಮುಖ ಸಂಗತಿಯೆಂದರೆ, ನಿರ್ಮಲಾ ಸೀತಾರಾಮನ್ ಅವರು ಯಾವುದೇ ಇಂತಹ ಹೂಡಿಕೆ ಯೋಜನೆಯನ್ನು ಪ್ರಚಾರ ಮಾಡಿಲ್ಲ. ಅವರ ಹೆಸರಿನಲ್ಲಿ ಹರಿದಾಡುತ್ತಿರುವ ವಿಡಿಯೋ ನಕಲಿ ಮತ್ತು AI ಮೂಲಕ ಸೃಷ್ಟಿಸಿರುವುದಾಗಿದೆ. ಸರ್ಕಾರವೂ ಇಂತಹ ವಿಡಿಯೋಗಳ ಬಗ್ಗೆ ಎಚ್ಚರಿಕೆ ನೀಡಿದೆ.
ಹೀಗಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಖ್ಯಾತ ವ್ಯಕ್ತಿಗಳು ಹೂಡಿಕೆ ಮಾಡಲು ಹೇಳುತ್ತಿದ್ದಾರೆ ಎಂಬ ಕಾರಣಕ್ಕೆ ಯಾವುದೇ ಲಿಂಕ್ಗಳನ್ನು ನಂಬಬೇಡಿ. ಖಚಿತ ಲಾಭದ ಭರವಸೆ ನೀಡುವ ಅಪರಿಚಿತ ಹೂಡಿಕೆ ಯೋಜನೆಗಳಿಂದ ದೂರವಿರಿ. ಹಣ ಹೂಡಿಕೆ ಮಾಡುವ ಮುನ್ನ ಅದರ ವಿಶ್ವಾಸಾರ್ಹತೆಯನ್ನು ಪರಿಶೀಲಿಸಿ.
ಒಂದು ವೇಳೆ ಸೈಬರ್ ವಂಚನೆಗೆ ಒಳಗಾದರೆ ತಕ್ಷಣ 1930 ಸಹಾಯವಾಣಿಗೆ ಕರೆ ಮಾಡಿ ದೂರು ದಾಖಲಿಸಿ. ತಡ ಮಾಡಿದಷ್ಟೂ ಹಣ ಮರಳಿ ಪಡೆಯುವ ಅವಕಾಶ ಕಷ್ಟವಾಗಬಹುದು.
ನೆನಪಿರಲಿ, ವಿಡಿಯೋದಲ್ಲಿ ಕಾಣಿಸುವ ಮುಖ ನಿಜವಾಗಿರಬಹುದು, ಆದರೆ ಅದರ ಹಿಂದೆ ಕೇಳಿಸುವ ಧ್ವನಿ ಮತ್ತು ನೀಡುವ ಭರವಸೆ ಸಂಪೂರ್ಣ ನಕಲಿಯಾಗಿರಬಹುದು!
ನಿಮ್ಮ ಕಣ್ಣಿಗೆ ಕಾಣುವುದೂ ಸುಳ್ಳಾಗಿರಬಹುದು! AI ಡೀಪ್ಫೇಕ್ ಬಳಸಿ ನಡೆಯುತ್ತಿದೆ ಕೋಟ್ಯಂತರ ರೂಪಾಯಿ ಹೂಡಿಕೆ ವಂಚನೆ!
