ಬೆಂಗಳೂರು ತ್ಯಾಜ್ಯ ಟೆಂಡರ್‌ನಲ್ಲಿ ಅಕ್ರಮ ಆರೋಪ: BSWML ವಿರುದ್ಧ ತನಿಖೆಗೆ CRF ಆಗ್ರಹ

ಬೆಂಗಳೂರು: ಬೆಂಗಳೂರು ಸಾಲಿಡ್ ವೇಸ್ಟ್ ಮ್ಯಾನೇಜ್‌ಮೆಂಟ್ ಲಿಮಿಟೆಡ್ (BSWML) ಘನತ್ಯಾಜ್ಯ ಸಂಗ್ರಹಣೆ ಮತ್ತು ಸಾಗಣೆ ಟೆಂಡರ್‌ಗಳಲ್ಲಿ ಸುಮಾರು ₹350 ಕೋಟಿ ಆರ್ಥಿಕ ಅಕ್ರಮ ನಡೆದಿರುವ ಸಾಧ್ಯತೆಯ ಬಗ್ಗೆ ಸ್ವತಂತ್ರ ಉನ್ನತ ಮಟ್ಟದ ತನಿಖೆ ನಡೆಸುವಂತೆ ಸಿಟಿಜನ್ ರೈಟ್ಸ್ ಫೌಂಡೇಶನ್ (CRF) ರಾಜ್ಯ ಸರ್ಕಾರವನ್ನು ಒತ್ತಾಯಿಸಿದೆ.

2025ರ ಜುಲೈ 30ರಂದು ಪ್ರಕಟಿಸಲಾದ 33 ಪ್ಯಾಕೇಜ್‌ಗಳ ಟೆಂಡರ್ ಹಾಗೂ 2026ರ ಸೆಪ್ಟೆಂಬರ್ ಮತ್ತು ಅಕ್ಟೋಬರ್‌ನಲ್ಲಿ ನಡೆದ ನಂತರದ ಟೆಂಡರ್ ಪ್ರಕ್ರಿಯೆಗಳನ್ನು ಪರಿಶೀಲಿಸುವಂತೆ ಪ್ರತಿಷ್ಠಾನ ಮನವಿ ಮಾಡಿದೆ.

ಅಂದಾಜು ಟೆಂಡರ್ ಮೊತ್ತಕ್ಕಿಂತ ಶೇ.14ರಷ್ಟು ಹೆಚ್ಚಿನ ದರದಲ್ಲಿ ಗುತ್ತಿಗೆ ನೀಡಲಾಗಿದೆ ಅಥವಾ ನೀಡಲು ಪ್ರಸ್ತಾಪಿಸಲಾಗಿದೆ. ಇದರಿಂದ ಸಾರ್ವಜನಿಕ ಹಣಕ್ಕೆ ಸುಮಾರು ₹350 ಕೋಟಿ ಹೆಚ್ಚುವರಿ ಹೊರೆ ಬೀಳುವ ಸಾಧ್ಯತೆಯಿದೆ ಎಂದು CRF ಆರೋಪಿಸಿದೆ. ಹಣಕಾಸು ಇಲಾಖೆಯ ಆಕ್ಷೇಪಣೆಗಳು, ಸರ್ಕಾರ ನೇಮಿಸಿದ ಸಮಿತಿಗಳ ವರದಿಗಳು, ಟೆಂಡರ್ ತಿದ್ದುಪಡಿಗಳು ಮತ್ತು ಅರ್ಹತಾ ಮಾನದಂಡಗಳಲ್ಲಿನ ಬದಲಾವಣೆಗಳನ್ನೂ ಪರಿಶೀಲಿಸುವಂತೆ ಕೋರಿದೆ.

BSWMLನ ಉಪ ಪ್ರಧಾನ ವ್ಯವಸ್ಥಾಪಕ-1 ಚಂದ್ರಶೇಖರ್, ಮುಖ್ಯ ಪ್ರಧಾನ ವ್ಯವಸ್ಥಾಪಕ ಎಸ್.ವಿ. ರಾಜೇಶ್ ಮತ್ತು ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಕರಿಗೌಡ ಅವರ ಪಾತ್ರ, ಶಿಫಾರಸುಗಳು, ಅನುಮೋದನೆಗಳು ಹಾಗೂ ನಿರ್ಧಾರಗಳ ಸ್ವತಂತ್ರ ಪರಿಶೀಲನೆಗೆ ಮನವಿಯಲ್ಲಿ ಒತ್ತಾಯಿಸಲಾಗಿದೆ. ಗುತ್ತಿಗೆದಾರರು ಮತ್ತು ಬಿಡ್‌ದಾರರ ಪಾತ್ರವನ್ನೂ ತನಿಖೆಗೆ ಒಳಪಡಿಸಬೇಕೆಂದು ಕೋರಲಾಗಿದೆ.

ಮಾದರಿ ನೀತಿ ಸಂಹಿತೆ ಜಾರಿಯಲ್ಲಿದ್ದ ಅವಧಿಯಲ್ಲಿ ಸೆಪ್ಟೆಂಬರ್ 19, ಸೆಪ್ಟೆಂಬರ್ 23 ಮತ್ತು ಅಕ್ಟೋಬರ್ 8ರಂದು ಹೊರಡಿಸಲಾದ ಟೆಂಡರ್ ಅಧಿಸೂಚನೆಗಳ ಕಾನೂನುಬದ್ಧತೆಯನ್ನು ಪರಿಶೀಲಿಸುವಂತೆಯೂ ಪ್ರತಿಷ್ಠಾನ ಆಗ್ರಹಿಸಿದೆ. ಕೆಲವು ಪ್ಯಾಕೇಜ್‌ಗಳಿಗೆ ನೀಡಲಾದ ಕಾರ್ಯಾದೇಶಗಳ ಬಗ್ಗೆಯೂ ತನಿಖೆ ನಡೆಸಬೇಕೆಂದು ಮನವಿ ಮಾಡಿದೆ.

ಇದಲ್ಲದೆ, 33 ಪ್ಯಾಕೇಜ್‌ಗಳ ಸಮಗ್ರ ಲೆಕ್ಕಪರಿಶೋಧನೆಗಾಗಿ ಭಾರತದ ಮಹಾಲೇಖಪಾಲರು (CAG) ಮತ್ತು ಕರ್ನಾಟಕದ ಪ್ರಧಾನ ಲೆಕ್ಕಪರಿಶೋಧಕರಿಗೂ ಪ್ರತ್ಯೇಕ ಮನವಿ ಸಲ್ಲಿಸಲಾಗಿದೆ. ಸುಮಾರು ₹2,500 ಕೋಟಿ ಮೂಲ ಟೆಂಡರ್ ಮೊತ್ತದ ಮೇಲೆ ವಿಧಿಸಲಾದ ₹350 ಕೋಟಿ ಪ್ರೀಮಿಯಂ ಪರಿಶೀಲನೆಗೆ ಕೋರಲಾಗಿದೆ.

ವಾಹನ ಬಾಡಿಗೆ, ಇಂಧನ, ನಿರ್ವಹಣೆ, ಕಾರ್ಮಿಕರ ವೇತನ, ಗುತ್ತಿಗೆದಾರರ ಅರ್ಹತೆ, GPS, RFID ಹಾಗೂ ಪಾವತಿ ದಾಖಲೆಗಳನ್ನು ಪರಿಶೀಲಿಸಿ, ಅಕ್ರಮ ದೃಢಪಟ್ಟರೆ ಹೊಣೆಗಾರರ ವಿರುದ್ಧ ಕ್ರಮ ಕೈಗೊಳ್ಳಬೇಕು. ಅಗತ್ಯವಿದ್ದರೆ ಗುತ್ತಿಗೆ ರದ್ದು ಅಥವಾ ಮರು ಟೆಂಡರ್ ನಡೆಸಬೇಕು ಎಂದು CRF ಒತ್ತಾಯಿಸಿದೆ.

Leave a Reply

Your email address will not be published. Required fields are marked *