ಹೊಸ ವರ್ಷಕ್ಕೆ ಹೊಸ ಬ್ರ್ಯಾಂಡ್ ಎಂದು ಕೆಆರ್‌ಜಿ ಸಂಸ್ಥೆ ಪೋಸ್ಟರ್​ವೊಂದನ್ನು ರಿಲೀಸ್ ಮಾಡಿತ್ತು. ಇದು ಕಿಚ್ಚ ಸುದೀಪ್ ಅಭಿನಯ ಮಾಡುತ್ತಿರುವ ಸಿನಿಮಾವೇ ಎಂದು ಬಹುತೇಕ ಅಭಿಮಾನಿಗಳು ಅಂದುಕೊಂಡಿದ್ದರು. ಆದರೆ ಅದು ತಪ್ಪು ಆ ಸಿನಿಮಾದಲ್ಲಿ ನಟಿಸುತ್ತಿರುವ ಹೀರೋ ಯಾರು ಎನ್ನುವುದಕ್ಕೆ, ಉತ್ತರ ಸಿಂಪಲ್​.

2024ರ ಡಿಸೆಂಬರ್ 31 ರಂದು ಕೆಆರ್‌ಜಿ ಸಂಸ್ಥೆ ತಮ್ಮ ಅಧಿಕೃತ ಎಕ್ಸ್ ಖಾತೆಯಲ್ಲಿ ಹೊಸ ಸಿನಿಮಾ ಕುರಿತು ಪೋಸ್ಟ್​ ಅನ್ನು ಬಿಡುಗಡೆ ಮಾಡಿತ್ತು. ಇದು ಕಿಚ್ಚನ ಹೊಸ ಸಿನಿಮಾ, ಟೈಟಲ್​ ಏನಿರಬಹುದೆಂದು ಅಭಿಮಾನಿಗಳು ತಲೆ ಕೆಡಿಸಿಕೊಂಡಿದ್ದರು. ಆದರೆ ಇದು ಕಿಚ್ಚ ಸುದೀಪ್ ಅವರ ಸಿನಿಮಾವಲ್ಲ, ಬದಲಾಗಿ ಅವರ ಸಹೋದರಿಯ ಮಗನ ಸಿನಿಮಾವಾಗಿದೆ.

ಅಂದರೆ ಕಿಚ್ಚ ಸುದೀಪ್ ಅವರಿಗೆ ಸೋದರಳಿಯ ಆಗುವ ಸಂಚಿತ್ ಸಂಜೀವ್ ಅವರ ಮೊಟ್ಟ ಮೊದಲ ಸಿನಿಮಾ ಇದು ಆಗಿದೆ. ಈ ಮೂವಿಯನ್ನು ನಿರ್ದೇಶಕ ವಿವೇಕ್ ಅವರು ನಿರ್ದೇಶನ ಮಾಡುತ್ತಿದ್ದಾರೆ. ಅಲ್ಲದೇ ವಿವೇಕ್ ಅವರು ಇದೇ ಮೊದಲ ಬಾರಿಗೆ ನಿರ್ದೇಶನ ಮಾಡುತ್ತಿರುವ ಸಿನಿಮಾ ಇದಾಗಿದೆ. ಈ ಸಿನಿಮಾಕ್ಕೆ ಕೆಆರ್​ಜಿ ಸ್ಟುಡಿಯೋಸ್ ಹಾಗೂ ಸುಪ್ರಿಯಾನ್ವಿ ಪಿಕ್ಚರ್​ ಸ್ಟುಡಿಯೋ ಬಂಡವಾಳ ಹಾಕುತ್ತಿದೆ. ಸುದೀಪ್ ಅವರ ಪತ್ನಿ ಪ್ರಿಯಾ ಸುದೀಪ್, ಕಾರ್ತಿಕ್ ಮತ್ತು ಯೋಗಿ ಜಿ ರಾಜ್​ ಅವರು ಹಣವನ್ನು ಹಾಕುತ್ತಿದ್ದಾರೆ.

ಸುದೀಪ್ ಅವರ ಸೋದರಳಿಯ ಆಗುವ ಸಂಚಿತ್ ಸಂಜೀವ್ ಅವರ ಮೊಟ್ಟ ಮೊದಲ ಸಿನಿಮಾದ ಹೆಸರೇನು, ಯಾರು ಯಾರು ಸಿನಿಮಾದಲ್ಲಿ ಅಭಿನಯಿಸಲಿದ್ದಾರೆ, ಇದರಲ್ಲಿ ಸುದೀಪ್ ಅವರು ಇದಾರಾ ಎನ್ನುವ ಮಾಹಿತಿಗಳು ಸದ್ಯದಲ್ಲೇ ಗೊತ್ತಾಗಲಿವೆ. ಅಂದ್ಹಾಗೆ ಈ ಮೂವಿಯ ಫಸ್ಟ್ ಲುಕ್ ಅನ್ನು 2025ರ ಜನವರಿ 24 ರಂದು ಬಿಡುಗಡೆ ಮಾಡಲಾಗುತ್ತದೆ ಎಂದು ತಿಳಿಸಲಾಗಿದೆ. ಸಂಚಿತ್ ಸಂಜೀವ್ ಅವರು ಈ ಹಿಂದೆ ಜಿಮ್ಮಿ ಎನ್ನುವ ಸಿನಿಮಾವನ್ನು ತಾವೇ ನಿರ್ದೇಶಿಸಿ, ನಟನೆ ಮಾಡುತ್ತಿದ್ದರು. ಆದರೆ ಇದು ಈಗ ನಿಂತು ಹೋಗಿದೆ ಎಂದು ಹೇಳಲಾಗಿದೆ. ಹೀಗಾಗಿ ಹೊಸ ಸಿನಿಮಾ ಕೈಗೆತ್ತಿಕೊಂಡಿದ್ದಾರೆ.